Kringsjå 36, august 2000

Norsk lokalhistorie ved milleniumsskiftet. Status og framtidsperspektiv

Norsk lokalhistorisk institutt (NLI) og Landslaget for lokalhistorie (LLH) vil i fellesskap arrangere eit seminar i Tønsberg 20-22.10 2000, der framtida for lokalhistoria skal stå i fokus.

Kor går lokalhistoria? Kva plass har lokalhistoria i samtida, og korleis skal ho forholde seg til omgjevnadene? Skal ønska til politikarane og lokalbefolkninga vere retningsgjevande for faghistorikarane sine interesser? Seminaret har 12 innleiarar som frå kvar sin ståstad rettar søkjelyset mot ulike sider av lokalhistoria.

Stad:
Rica Klubben Hotel, Tønsberg. Prisar: helpensjon kr. 695 pr. person pr. døgn i dobbeltrom, kr. 895 i enkeltrom. Dagspakke kr. 315 (lunsj, kaffe, møterom); middag kr. 245.

Frist for påmelding: 20. september.

Du kan melde deg på ved å ringe tlf. 21 02 17 53 eller sende e-post til Bente Granrud

Program for seminaret:

FREDAG 20/10:

17.00-19.00: Norsk lokalhistorie i framtida

• Anders Kirkhusmo, styreleder i Landslaget for lokalhistorie og førsteamanuensis ved NTNU: Historielagene - bærebjelker i levedyktige lokalsamfunn?
• Hans Hosar, forsker og fungerende instituttstyrer ved NLI: Traust eller trendy? Har eller bør NLI ha ein eigen fagprofil?
• Lars Thue, forsker ved Handelshøyskolen BI: Kompleksitet, kontingens og kommune. Lokalsamfunn og lokalhistorie i lys av nyere sosial systemteori.
• Felles debatt etter de tre innleggene

20.00: Middag

LØRDAG 21/10:

09.00-12.30: Lagsarbeid og nærmiljø

• 09.00-10.00: Roy Høibo, styrer ved Arkeologisk museum i Stavanger, tidl. styrer ved Ryfylkemuseet: Lokalhistorie som fleirkulturell møteplass
• 10.00-11.00: Egil Nysæter, fylkesarkivar i Hordaland:

  Historie som lokalt samarbeidsprosjekt

• 11.00-11.30: Kaffe
• 11.30-12.30: Jørg Eirik Waula, direktør ved Utstein Kloster:

  Skal de hundre blomster blomstre - eller trengs det en gartner? Tanker om framtidig virksomhet i historielagene.

12.30-14.00: Lunsj

14.00-18.00: Lokalhistoriens ulike roller

• 14.00-15.00: Ola Alsvik, bygdebokforfatter:

  Lokalhistorikeren - spesialist i småsamfunn?

• 15.00-16.00: Birger Lindanger, bygdebokforfatter:

  Lokalhistorie - nærmiljøets lim?

• 16.00-16.30: Kaffe
• 16.30-17.30: Arnfinn Kjelland, bygdebokforfatter og førsteamanuensis ved høgskolen i Volda:

  Heim og ætt for nye generasjonar. Frå gards- til småsamfunnshistorie.

19.30: Middag og selskapelig samvær

Kåseri ved Per Thoresen, styrer for Vestfold fylkesmuseum

SØNDAG 22/10:

09.00-13.00: Lokalhistorie - et redskap i samfunnsdebatten?

• 09.00-10.00: Ivar Bjørklund, førstekonservator ved UiTr.:

  Skal lokalhistorie være identitetsskapende?

• 10.00-11.00: Aud Mikkelsen Tretvik, forsker NTNU: Lokalhistorie som kunnskapsleverandør i miljøvernet
• 11.00-11.30: Kaffe
• 11.30-12.30: Innlegg fra politikerhold om lokalhistorie med utgangspunkt i Stortingsmelding nr. 22 (1999-2000): "Kjelder til kunnskap og opplysning. Om arkiv, bibliotek og museer i ei IKT-tid".
• 12.30-13.00: Avsluttende debatt og oppsummering

13.00: LUNSJ

 

NLI - bibliotek og lesesal

Vi har fått nytt og større bibliotek her i Kronprinsens gate 9. Her er det god plass til både bøker og lesesalsgjester. Vi har ei omfattande topografisk samling, og biblioteket inneheld dessutan generell historisk og lokalhistorisk litteratur, samt bøker innan tilgrensande fagområde som etnologi, folkloristikk, namnegransking og arkivkunnskap.

Biblioteket har ein tilvekst på om lag 450 band kvart år. Kring årsskiftet omfatta biblioteket 15.082 band, av desse er over tre fjerdedelar bygdebøker og annan lokalhistorisk litteratur. Blant desse finst om lag 350 lokalhistoriske årbokstitlar frå historielag, museum og andre. Vi har jamvel fått ei eiga avdeling for tidsskrift, med 80 titlar av interesse for lokalhistorikarar.

Biblioteket har fire lesesalsplassar der ein kan arbeide på eigen pc. Her finst også ein publikumsterminal der ein kan søkje i bibliotekkatalogen. Frå denne pc'en vil det etter kvart bli mogleg å søkje i instituttet sine databasar over noregsbrev og over bygdebokdekninga i Noreg.

Biblioteket er ope for publikum kvardagar mellom kl. 9 og 15. Har du spørsmål til bibliotekaren, kan du også ringe tlf. 21 02 17 57 eller sende en e-post til Marianne Wiig.

BG/MW

Argusklipp om lokalhistorie - ei gløymd kjelde?

NLI har ei omfattande samling klipp frå aviser frå heile landet, som omhandlar bygdebøker, bygdebokarbeid og anna lokalhistorisk verksemd. Klippsamlinga gjeng attende til 1950-talet, og omfattar så og seie alt som har vore skrive om by- og bygdebokverksemda i aviser i Noreg. Hovudvekta av klippa er frå 1970 og framover, og reflekterer i så måte auken i bygdebokskrivinga som har funne stad i denne perioden. Klippa er arkivert i mappar og permar på kommunenamn, og gjev såleis eit godt oversyn over kva som har skjedd på bygdebokfronten i dei einskilde kommunane. Ved NLI blir klippa brukt som kjelde til den årlege bibliografien over lokalhistorisk litteratur, og som grunnlag for ein kortkatalog over pågåande bygdebokarbeid og over bygdebokforfattarar. Argusklippa er tilgjengelege i biblioteket ved NLI.

BG

Nye bygdebøker og årbøker 1999

Lokalhistoriske årbøker kjem ut trutt og jevnt. NLI har notert seg 306 utgjevingar i 1999. Det slår så vidt rekorden frå 1997 som var 304 årbøker. Også utgjevinga av bygdebøker held seg på eit jamnt nivå. I 1999 kom det ut i alt 43 band by- og bygdebøker, gards- og slektshistorie og regionhistorie.

NLI registrerer kvart år alt som kjem ut av by- og bygdebøker og årbøker og andre periodika med lokalhistorisk innhald. Oversynet blir vanlegvis trykt i Heimen hefte 2 året etter, men bibliografien for 1999 er publisert i Heimen 2000 nr. 3. Innførslene der opplyser også om utgjevar og adresse for å få tak i bøkene.

Av dei 43 lokalhistoriske bøkene i 1999 var det 27 band gards- og slektshistorie, 10 band generell bygdebok eller kultursoge, 3 band byhistorie og 3 band regionhistorie. Gjennomsnittet for dei siste fem åra er 42 band pr. år. Gards- og slektshistorie har det største omfanget med vel 20 band pr. år, medan dei generelle bygdebøkene ligg på 14 i snitt.

Dei 3 byhistoriene i 1999 var frå Fredrikstad, Kristiansand og Kristiansund, og alle gjeld 1900-talet. Dei 43 bøkene fordeler seg elles jamnt på Austlandet og Vestlandet. Denne gongen var det berre 2 band frå Nord-Noreg, men derifrå kjem det snart meir, for mange prosjekt er i gang.

Av årbøkene er dei fleste utgitt av lokale historielag o.l., noen av regionale lag og eit tredvetals hefte kjem frå regionale museum eller andre kulturinstitusjonar. Alle har lokalhistorie eller slektshistorie som hovudtema. Mange årbøker er årvisse, medan somme kjem ut annankvart år. Talet på aktive årbokredaksjonar ligg såleis rundt 330. Somme stader har utgjevinga stoppa opp for kortare eller lengre tid. På den andre sida dukkar det kvart år opp nokre nye årbokseriar. Mykje friviljug innsats for lokalmiljøet blir nedlagt på dette feltet.

LM

Nytt om kart

Jordskifteverket sitt kartarkiv er lagt ned, og verksemda er desentralisert til fylkesjordskiftekontora. Dei har mikrofilm av alle kart frå før 1990, og originalkart frå åra etter, og vil frå no av ha ansvar for brukartenester. Riksarkivet har i vår motteke 30 000 jordskiftekart frå tida før 1990, som ikkje lenger vil vere tilgjengelege for publikum. Men Riksarkivet vil på same måte som fylkesjordskiftekontora ha mikrofilm av avleverte originalar, til bruk på lesesalen.

NLI er i gang med ei revidering av Gamle norske kart. Dette er ein felleskatalog over utrykt norsk kartmateriale frå tida før 1900, og med gardskart fram til 1970-åra. I katalogen er registrert kartsamlingar i arkiv, bibliotek og andre offentlege institusjonar i Noreg, Sverige og Danmark. Det er innhenta nye opplysningar frå aktuelle institusjonar, men vi ventar på at fylkesjordskiftekontora skal oppdatere sine katalogar. Kartkatalogen har til no vore utgjeve med fylkesvise bind, men det er planar om å gjere den reviderte utgåva til ein database tilgjengeleg på Internett.

BG

Nye bøker

Norske prestegarder

. Folk og hus. Jan E. Horgen. Oslo : Landbruksforlaget, 1999. 311 s. ISBN 82-529-2399-2. Kr. 478,-.

I denne boka blir det for fyrste gong gjeve ei samla framstilling av prestegardane si kulturhistorie. Hovudvekta er lagt på gardssamfunnet på prestegarden, bygningshistoria og på den historiske bakgrunnen og utviklinga. Boka har også ein historisk-juridisk bakgrunn, skrive av Ulrik Sverdrup-Thygeson, som tek for seg prestegardane si rettslege stilling heilt frå mellomalderen og fram til avviklinga av prestegardar som embetsgardar frå 1950-talet.

Boka gir eit godt oversyn over dei ulike kjeldene som finst til både bygningshistorie og kulturhistorie frå mellomalderen og fram til 1950-talet, og viser korleis desse kan nyttast på eit konkret materiale. Mellom anna viser framstillinga kor innfløkt vedlikehaldet av dei ulike bygningane kunne vere, med fordeling av vedlikehaldsplikt på både allmoge og prest, ofte fordelt slik at dei hadde ansvar for kvar sine delar av eit hus! Framstillinga går inn på einskildhusa på garden, og fortel om kva som finst av hus attende til mellomalderen, og kva funksjon dei hadde. Horgen gjev ei interessant framstilling av prestegarden, kven som budde der, gardsbruket og prestegardssamfunnet, og korleis utviklinga og samfunnsmessige endringar har påverka dette. Horgen tek også for seg prestegarden som eit sentrum i bygda, som eit bindeledd utover lokalsamfunnet, og han ser på prestegarden som administrativt og kulturelt sentrum. Horgen følgjer utviklinga av prestegardane heilt fram til i dag, og lesaren får gjennom dette innblikk i både prestegardane si stordomstid, og i endringane som fann stad fram mot avviklinga av prestegardssystemet.

Boka er rikt illustrert med eldre foto, teikningar og kart. Ein stor del av dette biletmaterialet har ikkje vore publisert tidlegare.

BG

NIKU strategisk instituttprogram 1996-2000

. Hus i Norge. Kilder om hus. Skrift-lige kilder, bil-der, muntlige kilder. Jan E. Horgen. Oslo : NIKU, 2000. 32 s. ISBN 82-426-1101-7.

NIKU (Norsk institutt for kulturminneforskning) har i samanhang med det ovanfor omtala prosjektet om prestegardar, gjeve ut eit temahefte om kjelder til bygningshistorisk forsking. Temaheftet tek for seg tre grupper av kjelder; skriftlege og munnlege kjelder, og bilete. Dei viktigaste skriftlege kjeldene som er omtala, er åbotstakstar, branntakstar, skifte, vitneprov, arkitektteikningar og kart. Bilete omfattar foto, teikningar og måleri. Munnlege kjelder omfattar både intervjumateriale, utskrifter av desse, og nedteikna minnemateriale.

Kvar kjeldetype er kort omtala, mellom anna med opplysningar om i kva slag institusjon dei finst. Heftet har også ein eigen bolk om bruk av kjelder til prestegardane si bygningshistorie.

BG

Eneveldets menn i Norge.

Sivile sentralorganer og embetsmenn 1660-1814. Tor Weidling. Oslo : Riksarkivaren ; Messel, 2000. 334 s. Riksarkivarens skriftserie 7. ISBN 82-548-0065-0.

Sentraladministrasjonen i København og sentralorganer i Norge 1660-1814.

Alfhild Nakken. Oslo: Riksarkivaren ; Tano Asch., 2000. 144 s. Riksarkivarens skriftserie 9. ISBN 82-518-4036-8.

Sidan Riksarkivaren i 1996 tok til å gje ut ein eigen skriftserie, har det kome ni nummer i rekkja. Dei fleste av desse er handbøker eller handbokliknande utgjevingar som har direkte bruksverdi for lokalhistorikarar. To av den kategorien, nr 7 og 9 kom båe ut i år.

Eneveldets menn i Norge, av førstearkivar i Riksarkivet Tor Weidling, fell i to hovuddelar. I fyrste delen blir alle dei sivile sentralorgana i Noreg, og dessutan lensherre/amtmanns- og stiftamtmannsembeta gjevne ei kort, men instruktiv omtale med kronologisk liste over vedkomande embetsinnehavarar. Geistlege og reint militære embete er ikkje med i oversynet. Andre delen, som utgjer nær 2/3 av boka, er ei alfabetisk ordna samling av biografiar over alle innehavarane av dei embeta som er omtala i fyrste delen. Ikkje minst biografidelen av boka synest særs nyttig som oppslagsverk for lokalhistorikarar og slektsforskarar som arbeider med perioden.

Sentraladministrasjonen i København og sentralorganer i Norge 1660-1814 er skriven av leiaren for Eldre avdeling i Riksarkivet Alfhild Nakken. Boka er fyrst og fremst tenkt som lærebok i arkivkunnskap ved Universitetet, og tek for seg administrasjonsordning og arkivdanning i "den sentraladministrasjonen som har styrt Norge, uansett om den har hatt sete i vårt eget land eller utenfor landets grenser". For lokalhistorikaren har vel ikkje boka same praktiske oppslagsverdi som den føregåande. Men Nakken si bok gjev oversiktleg og oppklarande kunnskap om embete og statsorgan som lokalhistorikaren ofte støyter på i arbeidet sitt med kjeldene frå einevaldstida.

Riksarkivarens skriftserie

har førebels kome med desse nummera:

1. Egil Øvrebø: I Kongens teneste. Militær utskriving frå Bergens stift under Store nordiske krig 1709-1719. (1996)

2. Liv Mykland: Fri religionsutøvelse gjennom 150 år. Om kilder til dissenternes historie. (1997)

3. Kjeld Helland-Hansen: Føderådsordningens historie i Norge. (1997)

4. Ola Bjerkås: Preste- og prostearkiver. En brukerveiledning. (1997)

5. Knut Johannessen: Kunst med kongelig resolusjon. Kommunevåpen i Riksarkivet gjennom hundre år 1898-1998. (1998)

6. Liv Mykland, Eilert Bjørkvik, Lars Hamre: Alf Kiil. Et livsløp blant arkiver. (1998)

7. Tor Weidling: Eneveldets menn i Norge. Sivile sentralorganer og embetsmenn 1660-1814. (2000)

8. John Herstad: I helstatens grep. Kornmonopolet 1735-88. (2000)

9. Alfhild Nakken: Sentraladministrasjonen i København og sentralorganer i Norge 1660-1814. (2000)

HPH

Ord om lokalhistorie

Det vi etter min oppfatning trenger, er en global følelse av det lokale, en global stedsfølelse

Doreen Massey: En global stedsfølelse. I: Jonny Aspen og John Pløger (red): På sporet av byen, Oslo 1997.

Lokalhistorisk Afdeling nedlagt

Den 15. juni i år heldt Knud Prange avskilsforelesinga si ved Institut for Historie, Universitetet i København. Han går av med pensjon etter 30 år som lektor ved instituttet og leiar for Lokalhistorisk Afdeling. Prange var den fyrste leiaren for denne avdelinga frå ho vart oppretta og lagt til Institut for Historie i 1970. Han skulle også bli den siste leiaren, da Institut for Historie av spareomsyn og som følgje av omprioriteringar har nytta høvet til å leggje ned avdelinga i og med Prange sin avgang.

Avviklinga av Lokalhistorisk Afdeling har vekt ei viss oppsikt. Institut for Historie og universitetsleiinga har motteke ei lang rekkje protestar frå organisasjonar, institusjonar og enkeltpersonar. Søsterinstitusjonar i grannelanda, derunder NLI, har gjeve uttrykk for undring og vonbrot, ikkje minst med tanke på framtida for det gode nordiske samarbeidet på det lokalhistoriske feltet. Prange var initiativtakar til det fyrste nordiske lokalhistoriske seminaret som vart avvikla på Sostrup slott i Danmark i 1973. Sidan har dette vore eit fast innslag med treårlege mellomrom, med Stadshistoriska Institutet i Stockholm, Lokalhistoriska Byrån i Finland, Norsk lokalhistorisk institutt og altså Lokalhistorisk Afdeling som alternerande arrangørar. Prange stod også i spissen for det førebels siste i rekkja, det 9. nordiske lokalhistoriske seminaret på Magleås i Danmark i 1998.

Det lokalhistoriske faglege arbeidet har vore noko ulikt organisert i dei nordiske landa, med ulike trådar knytta til høvesvis humanistiske forskingsinstitutt, arkivvesen, lokalhistoriske oppdragsgjevarar (kommunar etc.) og lokalhistoriske rørsler og amatørmiljø. Såleis ser ein både likskapar og skilnader når ein jamfører Lokalhistorisk Afdeling med til dømes NLI. Lokalhistorisk Afdeling har i motsetnad til NLI altså vore ein del av eit universitetsinstitutt, og har slik sett mest vore å samanlikne med dei lokalhistoriske spesialmiljøa ved fleire universitet og høgskular i Noreg. Det har mellom anna innebore undervisningsplikt og rettleiing overfor studentar som skriv «speciale» og ph.d.-avhandlingar med lokalhistoriske emne. Men samstundes som den eine sida av det todelte formålet for avdelinga har vore «at interessere studerende for lokalhistorisk arbejde» har den andre sida vore «at støtte lokalhistorisk arbejde uden for universitetet». I det siste finn vi ein klår parallell til NLI si verksemd. Lokalhistorisk Afdeling har gjeve ut ei rekkje handbøker og rettleiingshefte for lokalhistorikarar av alle kategoriar. Prange har alltid gjeve direkte rettleiing til profesjonelle og amatørar i spesialdisiplinar som slektsforsking og heraldikk. Dette synes å vere eit trekk som skil avdelinga noko frå NLI i fagleg profil, iallfall om ein ser bort frå den type slektshistorie som inngår i dei norske bygdebøkene.

Eit anna særtrekk ved Lokalhistorisk Afdeling har vore den tette tilknytinga til det danske arkivverket. Trass i at avdelinga organisatorisk heile tida har tilhøyrt Institut for Historie, har Prange hatt sin fysiske arbeidsplass ved Landsarkivet for Sjælland («statsarkivet i København»). Mykje av undervisningstida hans har gått med til å halde to semesters arkivkurs for studentar i historie, etnologi m.m.

Frå historikarhald har misnøyen med nedleggjinga av Lokalhistorisk afdeling vore grunna i den faglege vridninga som kan følgje av at studentane sin kjennskap til historisk primærmateriale - arkivkunnskapane - kan bli svekka. Institut for Historie har freista dempe denne otten ved å love å innføre eit kortare kurs i arkiv- og museumsfag. Frå instituttets side inngår også i forsvarsargumenta at lokalhistorisk verksemd i dag har ein mykje breiare institusjonell basis å stå på utover i heile landet enn kva som var tilfelle for 30 år sidan. Mellom anna kan det påpeikast at det i dag finst mykje over 400 lokalhistoriske arkiv i Danmark. Ein ikkje ringe del av den profesjonelle staben ved desse institusjonane har faktisk site under Knud Prange sitt kateter.

HPH

Frå bygdebok til doktorgrad

Cand. philol. Aud Mikkelsen Tretvik har i si doktoravhandling i historie ved NTNU i Trondheim, studert to konflikttypar innanfor eit lokalområde, Ålen og Røros tinglag, på 1700-talet. Avhandlinga har fått tittelen Tretter, ting og tillitsmenn. En undersøkelse av konflikthåndteringa i det norske bygdesamfunnet på 1700-tallet, og er gitt ut som nr. 32 i skriftserien frå Historisk institutt ved NTNU, Trondheim 2000. Tretvik har tidlegare skrive gards- og ættesoge for Ålen, og det var problemstillingar ho oppdaga under arbeidet med bygdeboka som ho no vidarefører i avhandlinga. Tretvik disputerte på avhandlinga i juni, og NLI gratulerer!

BG

Skjermkontakt med lokalhistorien

Lokalhistorie er ett av folkebibliotekenes områder som egner seg godt for et samarbeid under «ABM-paraplyen" (arkiv, bibliotek og museum). Syv spennende enkeltprosjekter har blitt organisert i et felles nettverksprosjekt kalt Skjermkontakt med lokalhistorien, med Statens Bibliotektilsyn som koordinator og veileder. De lokale prosjektene er av ulik karakter, både med hensyn til mål, tema og form, men har alle til felles at de vil løfte frem deler av lokalhistorien ved å gjøre bruk av Internettets utvidede muligheter i forhold til det fysiske rom. Prosjektene har alle én eller flere samarbeidspartnere innen arkiv, museum eller skoleverk. Nettopp fordi prosjektene er forskjellige, vil erfaringene både fra nettverksarbeidet og fra hvert enkelt delprosjekt gi verdifull erfaring i det videre samarbeidet rundt lokalhistorie innen ABM-sektoren.

Informasjon om prosjektet, som går over tre år, finnes på nettet: http://www.bibtils.no/innhold/tilskudd/skjermkon/index.htm hvor blant annet hvert enkelt av delprosjektene presenteres. Blant prosjektene finnes søkbare baser over lokalhistorisk materiale (Telemarksbiblioteket og Sogndal bibliotek), digitalisert byhistorie for Porsgrunn kombinert med fotohistorisk arkiv, lokalhistorisk nettsted for Austevoll tilrettelagt for skoleelever, bygdebok på nett (Fusa folkebibliotek), interaktiv base for lokalhistorie (Ål bibliotek), og et formidlingsprosjekt i samarbeid med museumssektoren (Stavanger bibliotek).

Siden paraplyprosjektet startet opp i 1999 er en del resultater blitt synlig på nettet. Ett av dem er Lokalhistoriske spørjevev - et samarbeid mellom Sogndal bibliotek, Fylkesarkivet i Sogn og De Heibergske Samlinger - Sogn Folkemuseum.

Når det gjelder felles problemstillinger rundt opphavsrettslige spørsmål, formidling, samarbeid mellom institusjoner og tekniske løsninger løftes disse opp og forfølges på nasjonalt plan. Paraplyprosjektet vil i løpet av prosjektperioden bruke Internett som en kanal for å informere om arbeidet som gjøres, slik at det er muligheter for å høste erfaringer underveis.

Skjermkontakt med lokalhistorien avsluttes med et seminar i november 2001. Det vil være naturlig å trekke inn aktuelle samarbeidspartnere underveis for å finne gode løsninger på hvordan prosjektet eventuelt kan videreføres, gjerne i samarbeid med andre innen ABM-sektoren. Prosjektleder Sidsel Hindal tar gjerne imot tips og innspill fra det lokalhistoriske fagmiljøet, og kan kontaktes på telefon 21 02 17 26, eller via e-post: sidsel.hindal@bibtils.no.

Sidsel Hindal

Lokalhistorie - ein internasjonal disiplin

Den 19. internasjonale historikarkongressen gjekk av stapelen i Oslo i veka frå 6.-13. august. I samband med denne fekk vi på fleire vis stadfesta at lokalhistorie er ein særs internasjonal disiplin, også på profesjonelt nivå.

Som på så mange andre felt, er det også her Kina som synest å ha tradisjonsrekord. Der har offentleg finansiert lokalhistorie 2000 år lange røter. I Russland blomstra lokalhistoria i tiåra før oktoberrevolusjon, og har nå fått ein renessanse etter å ha lege i dvale frå Stalin-tida av.

I eit foredrag på kongressen gjorde professor Masayuki Sato ved Yamanashi-universitetet i Japan greie for ei særs imponerande offentleg finansiert lokalhistorisk verksemd der. Japan er delt i 47 «fylke». Pr. i dag har 40 av desse gjeve ut sine «fylkessoger». For Yamanashifylket, med ca ein million innbyggjarar, skal det i 2004 føreliggje seks band generell historie frå førhistorisk tid til i dag, to band samlingar av folkeminne og kultursoge, og heile 19 band kjeldeutgåver. Av 55 «kommuner» innan dette fylket har 50 fullført sine «bygdebøker». Situasjonen er om lag tilsvarande i dei andre fylka.

NLI inviterte under kongressveka lokalhistorisk interesserte deltakarar til ei uformell samkome i dei nye lokala våre. Der var professor Sato til stades, saman med representantar frå Russland, USA, Tyskland og Sverige. Internasjonalt kjende namn som David Sabean, Eva Österberg og Jürgen Schlumbohm gjorde ære på oss ved å møte opp. Saman med gode vener frå vårt eige land var vi i alt ca 30 menneske som utveksla erfaringar i ein hyggjeleg atmosfære. Vi vonar å kunne orientere litt meir om utanlandske lokalhistoriske miljø i seinare nummer av Kringsjå og/eller i andre fora.

HPH

Nettstedet har mottatt økonomisk støtte fra Kulturnett Norge